Saxavat Jafar | Saxavat Jafar

Texniki SEO nədir?

Texniki SEO (Technical SEO) – vebsaytın axtarış motorları tərəfindən daha asan indekslənməsi və istifadəçilərə daha sürətli, problemsiz təqdim olunması üçün görülən optimallaşdırma işləridir. Qısa desək, kontentin keyfiyyətli olması vacibdir, amma əgər sayt texniki baxımdan zəifdirsə, Google sizi irəli çıxarmayacaq. Detalları öyrənmək üçün oxumağa davam et.

Texniki SEO nədir və niyə vacibdir?

Texniki SEO – saytın “arxa planda işləyən mühərriki” kimidir. Google-un saytınızı daha tez tapması, səhifələri indeksləməsi və istifadəçilərə rahat təqdim etməsi vacibdir. Əgər sayt yavaş açılırsa, mobilə uyğun deyilsə və ya səhv yönləndirmələr çoxdursa, istifadəçilər çıxıb gedəcək. Araşdırmalara görə, yavaş açılan səhifələrin 53%-i ilk 3 saniyədə tərk olunur.

Sayt sürəti və performans

Səhifənin açılış sürəti istifadəçi təcrübəsinin əsas amilidir. Google-un alqoritmi sürətli saytları önə çıxarır, çünki istifadəçilər vaxt itirmək istəmir. Məsələn, Amazonun araşdırmasına görə, 1 saniyəlik gecikmə satışları 7% azaldır. Bu səbəbdən, şəkillərin optimizasiyası, keşləmə və sürətli serverlər bunun üçün mütləqdir. Saytınızın sürətini yoxlayın.

Mobil uyğunluq

Mobil cihazlardan axtarış payı artıq 60%-dən çoxdur. Google isə Mobile-First indeksləmə tətbiq edir, yəni saytınız mobil versiyaya əsasən qiymətləndirilir. Dizayn adaptiv deyilsə, məzmun düzgün oxunmursa, istifadəçilər saytı tərk edəcək. Mobil uyğunluq həm SEO, həm də müştəri təcrübəsi üçün kritikdir. Mobil uyğunluğu yoxlamaq üçün klik edin.

SSL və təhlükəsizlik

HTTPS olmadan sayt həm Google, həm də istifadəçilər üçün risklidir. Təhlükəsizlik sertifikatı (SSL) həm şəxsi məlumatların qorunmasını təmin edir, həm də axtarış motorları üçün müsbət siqnaldır. Google rəsmi olaraq HTTPS-i sıralama faktoru elan edib. Yəni, SSL olmadan saytınız rəqiblərdən geridə qala bilər. Saytınızın SSL-ni yoxlamaq üçün klik edin.

Crawl və indeksləmə

Axtarış motorları saytınızı “oxuyaraq” indeksləyir. Əgər robotlar səhifələrə girişdə çətinlik çəkirsə və ya səhvlərlə qarşılaşırsa, kontentiniz heç vaxt istifadəçilərə göstərilməyəcək. Robots.txt faylı, daxili linklər və düzgün sitemap bu prosesi asanlaşdırır. Nə qədər çox səhifə düzgün indekslənirsə, bir o qədər trafik qazanırsınız.

Texniki SEO-nun əsas elementləri

Texniki SEO-nu həyata keçirmək üçün bir neçə əsas addım var. Bu addımlar sayəsində saytınız həm istifadəçilər, həm də Google üçün daha etibarlı görünür. Buraya site structure, XML sitemap, robots.txt və düzgün yönləndirmələr daxildir. Məsələn, sitemap olmayan sayt Google üçün “xəritəsiz şəhər” kimidir.

Site Architecture (Sayt strukturu)

Saytın strukturunun sadə və aydın olması həm istifadəçilərin, həm də Google botlarının işini asanlaşdırır. Məsələn, 3 klik qaydası var: istifadəçi əsas səhifədən istənilən kontentə 3 klikdə çatmalıdır. Çox qarışıq və dərin menyular indekslənmə prosesini çətinləşdirir.

XML Sitemap və Robots.txt

Sitemap Google üçün “bələdçi xəritə” rolunu oynayır. Robots.txt isə hansı səhifələrin indekslənəcəyini, hansılarının isə məxfi qalacağını müəyyən edir. Əgər bu fayllar düzgün işləməsə, vacib səhifələr indekslənməyə bilər. Yəni, sitemap və robots.txt olmadan SEO nəticələri zəifləyir.

Canonical Tags

Bəzən bir məzmun bir neçə URL-də mövcud olur. Bu isə təkrarlanan kontent probleminə səbəb olur. Canonical tag Google-a göstərir ki, əsas səhifə hansıdır. Əgər düzgün tətbiq olunmazsa, saytın dəyəri parçalanır və sıralama düşür. Canonical səhifələr SEO gücünü birləşdirir.

Structured Data (Schema Markup)

Schema markup – Google-a kontentinizi daha yaxşı başa düşməyə kömək edən kodlaşdırmadır. Bu sayədə axtarış nəticələrində zəngin snippets (ulduz reytinqi, qiymət, FAQ) görünür. Statistikaya görə, schema istifadə edən saytlar 30% daha çox klik alır. Analiz etdiyiniz saytda hansı Schema-ların olmasını görmək üçün Google Rich Result Test alətindən istifadə edə bilərsiniz.

Texniki SEO alətləri

Texniki SEO daim nəzarət tələb edir. Bunun üçün Google Search Console, Screaming Frog, Ahrefs, SEMrush kimi alətlər istifadə olunur. Bu alətlər vasitəsilə saytınızdakı səhvləri izləyə və optimallaşdırma edə bilərsiniz. Məsələn, Google Search Console sizə hansı səhifələrin indeksləndiyini göstərir.

Google Search Console

Google-un təqdim etdiyi pulsuz alətdir. Saytın indekslənməsini, səhifə səhvlərini və klik məlumatlarını görmək mümkündür. Məsələn, hansı açar sözlərlə saytınıza trafik gəlir, hansı səhifələr indekslənmir – bunları öyrənə bilərsiniz. SEO-nun izlənməsi üçün ən əsas vasitədir.

Ahrefs və Semrush

Bunlar ödənişli alətlərdir və daha dərindən texniki SEO auditi aparır. Broken linklər, daxili linkləmə problemləri, sayt sürəti və daha çoxunu göstərirlər. Həmçinin rəqiblərin saytlarını analiz etməklə, onların güclü və zəif tərəflərini öyrənə bilərsiniz.”Ahrefs nədir və nə işə yarayır?” haqqında oxuya bilərsiniz.

Screaming Frog

Desktop proqramıdır və saytınızdakı bütün səhifələri skan edir. Bu alət ilə səhifələrin title, meta təsviri, canonical tag-ları, yönləndirmələri, şəkil optimizasiyası və digər yüzlərlə parametri yoxlamaq mümkündür. Xüsusən böyük saytlar üçün idealdır. Screaming Frog-u test etmək və praktika əldə etmək üçün indi yükləyin.

PageSpeed Insights

Google-un təqdim etdiyi bu vasitə həm masaüstü, həm də mobil versiyada sayt sürətini ölçür. Burada optimizasiya üçün tövsiyələr də verilir. Məsələn, böyük şəkillərin sıxılması, JavaScript-in azaldılması, keşləmənin gücləndirilməsi. Yüksək nəticə daha yaxşı sıralama deməkdir.

Texniki SEO və SEO strategiyasının əlaqəsi

Kontent və link building nə qədər güclü olsa da, texniki SEO olmadan nəticə zəif olacaq. Yəni, bu proses SEO-nun “əsası”dır. Texniki SEO – saytınızı həm istifadəçilər, həm də Google üçün əlçatan və sürətli etməkdir. Əsas elementlər: sayt sürəti, mobil uyğunluq, struktur, indeksləmə və davamlı audit. Düzgün tətbiq edildikdə, satış, trafik və sıralama artır.

Bəs sizdə hansı problem var?

Sizin saytınızda hansı texniki SEO problemi var: sürət, indeksləmə, yoxsa mobil uyğunluq? Saytınızı analiz edib fikirlərini mənimlə bölüşə bilərsən. Əgər Professional SEO xidməti və ya SEO kursu axtarırsansa, heç çəkinmədən mənimlə əlaqə saxla.

Saxavat Jafar

2018-ci ildən Marketinq sahəsində fəaliyyət göstərirəm.Bu günə qədər 20-ə qədər marka ilə işləmişəm. Hal-hazırda Rəqəmsal Marketinq üzrə Aparıcı Mütəxəssis olaraq AZAL-da işləyirəm. Bu tip yazılarla insanlara faydalı olmağa çalışıram.

saxavatjafar.com/

Texniki SEO nədir? Read More »

Veb-sayt sürətinin artırılması

Vebsayt sürəti istifadəçi təcrübəsi, axtarış motoru optimallaşdırması (SEO) və konversiya dərəcəsi üçün kritik əhəmiyyət kəsb edir. Tədqiqatlar göstərir ki, istifadəçilərin 53%-i bir vebsaytın yüklənmə müddəti 3 saniyədən çox çəkərsə onu tərk edirlər. Buna görə də vebsaytınızın yüklənmə sürətini artırmaq, həm müştəri məmnuniyyətini, həm də vebsaytınızın axtarış reytinqlərini yaxşılaşdırmaq üçün önəmlidir.

Bloqa başlamadan öncə “Rəqəmsal Marketinq Mütəxəssisi Kimdir?” başlığı ilə yazdığım bloqu da oxuya bilərsiniz.

Sayt sürətinin artırılması üçün addımlar:

SEO işlərində saytın sürətinin çox ciddi təsir var. Bunun üçün də bu mövzu bizim üçün olduqda əhəmiyyətlidi. Aşağıda vebsayt sürətini artırmaq üçün bəzi əsas addımlar təqdim olunur. Bu addımları diqqətlə izləyərək, veb-saytının sürətini indikindən 2x dəfə çox artıra bilərsiniz. Bu addımların icra olunmasında, proqramist dəstəyinə ehtiyacınız ola bilər.

1- Şəkillərin optimizasiya edilməsi

Vebsaytınızda istifadə etdiyiniz şəkillər çox vaxt yüklənmə sürətini ləngidən əsas faktorlardan biridir. Şəkillərin ölçüsünü kiçiltmək, doğru format seçmək (JPEG, PNG) və lazımsız məlumatları çıxartmaq ilə yüklənmə sürətini artırmaq mümkündür. Həmçinin, şəkillər üçün alternativ təsvirlər (alt text) əlavə etmək SEO üçün də faydalıdır.

Tövsiyə: Şəkillərinizi onlayn alətlərlə (məsələn, TinyPNG, ImageOptim) sıxışdırın.

2- Böyük faylların həcmini azaldın

Vebsaytınızdakı CSS, JavaScript və HTML fayllarını optimallaşdırmaq yüklənmə sürətini artırmağa kömək edir. Mümkünsə, bu faylları minimuma endirin, yəni lazımsız boşluqları və şərhləri silin. Həmçinin, “minify” texnologiyasından istifadə edərək fayl ölçülərini kiçiltmək mümkündür.

Tövsiyə: UglifyJS və CSSNano kimi alətlərdən istifadə edin.

3- Keşləmə (Caching) texnologiyası istifadə edin

Keşləmə, vebsaytınızdakı məlumatların müvəqqəti olaraq saxlanmasını təmin edir ki, bu da gələcək ziyarətlərdə yüklənmə müddətini azaldır. Brauzer keşini aktivləşdirmək və server tərəfdən keş sistemi quraşdırmaq saytı daha sürətli edə bilər.

Tövsiyə: W3 Total Cache və WP Super Cache kimi WordPress plaginləri ilə bu prosesi asanlaşdırın.

4- Serverin performansını yoxlayın

Vebsaytın yüklənmə sürətini təsir edən mühüm amillərdən biri serverin performansıdır. Yaxşı bir server seçimi, yüklənmə sürətinin artmasına kömək edə bilər. Veb hosting xidmətinizi müntəzəm olaraq qiymətləndirin və lazım gələrsə daha sürətli bir xidmətə keçin.

Tövsiyə: DigitalOcean və AWS kimi etibarlı bulud hosting xidmətlərini düşünün.

5- Content Delivery Network (CDN) İstifadəsi

CDN-lər, vebsaytınızın məzmununu müxtəlif coğrafi bölgələrdə yerləşən serverlərdə saxlayır, bu da istifadəçilərə daha yaxın olan serverdən məlumatların sürətlə çatdırılmasını təmin edir. Bu, yüklənmə müddətini əhəmiyyətli dərəcədə azalda bilər, xüsusən də beynəlxalq müştəriləriniz varsa.

Tövsiyə: Cloudflare və Akamai kimi CDN xidmətlərindən istifadə edin.

Veb-saytın sürətinin artırmaq bizə nə qazandıracaq?

Vebsaytın yüklənmə sürətini artırmaq üçün tətbiq olunan bu addımlar, yalnız istifadəçi məmnuniyyətini artırmaqla qalmır, eyni zamanda axtarış motorlarında daha yüksək reytinq əldə etməyə də kömək edir. Vebsaytınızın performansını mütəmadi olaraq yoxlayın və optimallaşdırma imkanlarını araşdırın. Beləliklə, müştərilərinizin vebsaytınızda daha uzun müddət qalmasını və onlarla əlaqələrinizi gücləndirməyinizi təmin edəcəksiniz.

Daha ətraflı məlumat üçün: Google PageSpeed Insights və GTMetrix alətlərindən istifadə edərək saytınızın sürətini ölçə bilərsiniz.

Saxavat Jafar

saxavatjafar.com/

Veb-sayt sürətinin artırılması Read More »

On-Page SEO nədir?

On-Page SEO termini Azərbaycan dilinə uyğunlaşdırdısaq Səhifə daxili və ya Sayt daxili SEO kimi ifadə edə bilərik. Ümumiyyətlə, SEO işləri bir neçə əsas qollardan təşkil olunub: On Page, Off Page və Technical SEO. Mən, bu mövzular haqqında detallı məlumatları sizinlə bölüşmək istəyirəm. Hər biri haqqında məlumat çox olduğu üçün hissə-hissə və daha aydın şəkildə izah etməyi məqsədə uyğun gördüm. Bu günkü yazımız, On Page SEO ilə əlaqəli olacaq. Burada işlər daha çox sayt daxili görülür və SEO-nun ən önəmli hissələrdən biridir deyə bilərəm.

On-Page SEO işlərinə nələr aiddir?

İlk öncə istəyirəm ki, On Page SEO ilə əlaqəli diqqət etməli olduğumuz faktorları sizə bir siyahı formasında təqdim edim, daha sonra hər biri haqqında qısa və aydın şəkildə məlumat verim. Düşünürəm ki, bu oxuyanlar üçün daha yaxşı variant olacaqdı.

On- Page SEO faktorları

Məzmun
Açar söz
URL Strukturu
Başlıq Hissəsi(Title)
Təsvir Hissəsi ( Description)
Səhifə Başlığı (Page Title)
Başlıq Etiketləri ( Header Tags)
Saytın Sürəti ( Page Speed)
Mobil Uyumluluq
Şəkillərin Optimallaşdırılması
Saytın Arxitekturası
Xarici Linklər
Daxili Linklər

Məzmun ( Content)

Məzmun Sayt daxili SEO işlərində çox əhəmiyyətlidir. Biz məzmundan məhsul və ya xidmət haqqında məlumat vermək məqsədi ilə istifadə edirik. Məzmun geniş anlayışdı, bura video materiallar, mətnlər və şəkillər və s. aid ola bilər. Alqoritmalar bizim sayta, sosial medyaya və digər kanallara əlavə etdiyimiz məzmun əsasında dəyərləndirmə aparır. SEO işlərində biz məzmunun bir çox formalarından istifadə edirik. Ən çox istifadə olunan məzmun tipi mətn formasıdır. Google və Yandex alqoritmaları sizin əlavə etdiyiniz mətnin əsasında səhifənin faydalılığını müəyyən edir. Hər zaman diqqət etmək lazımdır ki, yaradılan məzmun faydalı olsun, belə olduqda mütləq Google tərəfindən dəyərləndiriləcəksiniz!

Açar Söz

Açar söz SEO mətnlərinin yazılması zaman ən önəmli bir neçə nüansdan biridir. Çünki, Google və digər axtarış sistemlərində insanların axtarış etdiyi ifadələr açar sözlər hesab edilir. Biz hər zaman insanların axtarış niyyəti anlamalı və bunun əsasında mətnlərimizi formalaşdırmalıyıq. Açar sözlərlə əlaqəli çox mühim və praktiki bir məsələsini sizin üçün qeyd etmək istəyirəm. Azərbaycan dilində, ə, o, ö və ü kimi hərflərin işlənməsinə görə açar sözlərin axtarış həcmi arasında ciddi fərq vardır, ona görə bu tipli hərflərin iştirak etdiyi açar sözləri istifadə edərkən, digər variantları da yoxlamağı unutmayın!

Aşağıdakı şəkildən açar sözlərin səhifədə necə yerləşdirilməsi ilə bağlı məlumatları bir arada görə bilərsiniz. Bu yeni səhifə yaradarkən və ya köhnə səhifələri optimallaşdırarkən sizə lazım olacaq.

URL Strukturu

URL dedikdə, biz sadə formada səhifələrə yönləndirən link nəzərdə tuturuq. URL strukturu Texniki SEO ilə ortaq bir mövzu olduğu üçün burada ancaq Səhifə Daxili ( On Page) SEO ilə əlaqəli qeydlərimi edəcəm. Uğurlu URL strukturu üçüb aşağldakı amilləri nəzərə almanızı tövsiyə edirəm :

1. Açar sözlərin istifadə olunması

2. Qısa olması

3. Dillərə görə variantların olması(latin hərfləri ilə)

4. Ə,ı.ö və ü kimi hərflərin işlənməməsi ( URL strukturu ancaq latın hərflərini dəstəkləyir)

Nümunə :

https://saxavatjafar.com/az/reqemsal-marketinq-kursu

https://saxavatjafar.com/en/digital-marketing-course

https://saxavatjafar.com/ru/kurs-sifrovogo-marketinga

SEO Başlıq ( Title)

SEO başlıq dedikdə, Google-da axtarış etdikdə qarşısınıza çıxan tünd rəngli yazılar nəzərdə tutulur. Title və ya dilimizdə başlıq kimi tərcümə olunan bu hissə SEO üçün çox önəmlidir. Bu hissəllərin əlavə olunması ilə siz saytınızın trafikini 2-3 dəfə artıra bilərsiniz.

Başlıqları yazarkən bunlara xüsusi diqqət edin:

1. Müəyyən olunan xarakter limitini qoruyun ( təqribən 60 xarakter, 580 pixel )

2. Axtarış həcmi yüksək olan açar sözlər 1-ci əlavə edin.

3. Səliqəli və oxunaqlı görünməsinə diqqət edin (” -, |” kimi işarələrdən istifadə edin)

SEO Təsvir( Description)

SEO-da başlıq hissəsi ilə yanaşı, təsvir hissəsi də çox önəmlidir. Yuxarıda qeyd olunan 2-ci nüans təsvir hissəsi üçün də keçərli hesab edilir. Təsviri qısa, sadə, açar sözləri istifadə etməklə yanaşı və həmdə insanların klik etməyə təhrik edən sözlərdən istifadə etmək lazımdır. Misal: ilk dərs ödənişsizdi, endirim var, qeydiyyatın vaxtı bitir, məhsul stokda az qalıb və s. Bundan əlavə daha səliqəli görünməsi üçün müxtəlif ikonlardan istifadə edə bilərsiniz.

SEO Başlıq və Təsvir yazarkən Totheweb-dən istifadə etməyi tövsiyə edirəm :

Səhifə Başlığı ( Page Title)

Səhifə başlığı – Səhifənin nədən bəhs etdiyini həm istifadəçiyə həm də Google Bot-larına göstərmək üçün istifadə olunur. Bu başlıq H1 etiketi ilə ifadə olunmalıdır. Açar sözləri və səhifənin əsas məzmununi ifadə etməlidi.

Başlıq Etiketləri ( Header Tags)

Başlıq etiketləri Səhifə Daxili SEO işləri üçün çox önəmli elementlər hesab edilir. H1-H6 formasında bir iyeraxik quruluşa malik olan bu etiketlər əhəmiyyətlilik dərəcəsinə görə biri digərindən fərqlənir. H1 adətən Səhifə Başlığı olaraq qeyd edilir, H2-H6 isə daha çox mətn daxili başlıqları və alt başlıqları ifadə etmək üçün istifadə olunur. Qeyd edim ki, bir səhifədə yalnız 1 H1 etiketi istifadə oluna bilər. Digər etiketlərdə isə hər hansısa bir say məhdudiyyəti yoxdu. Lakin, yuxarıdan aşağıya (iyeraxik) quruluş qorunması lazımdır. Yəni, H2-dən sonra H3, H3-dən sonra H4 formasında. Uğurlu mətnlər bu formada yazılır.

Saytın Sürəti ( Page Speed)

Bu daha çox Texiki SEO mövzusunda müzakirə ediləcək amma bizim mövzu ilə də əlaqəlidir. Belə ki, Səhifə Daxili SEO işlərində istifadə oluna şəkillərin və ya videoların həcmi sürətin azalmasına səbəb ola bilər. Saytın sürəti dedikdə, axtarış səhifəsində klik etdikdən sonra səhifənin tam şəkildə açılması müddəti başa düşülür. Bu müddət nə qədər qısa olarsa, bu istifadəçinin saytdan faydalanması üçün bir o qədər təsirlidi. Saytın sürətini analiz etmək üçün Pagespeed və GTMetrix alətlərindən istifadə edə bilərsiniz.

Mobil Uyumluluq

Müasir dövrdə mobil telefonların istifadəsinin artması ilə əlaqədar veb-saytların mobil cihazlara daha uyğun bir formada hazırlanması çox zəruri olmuşdur. On Page SEO işlərində diqqət etməli olduğumuz digər mühüm nüans da məhz optimizasiya etmək istədiyimiz veb-saytın mobil cihazlarda nə qədər uğurlu görünməsidir. Buna, ingiliscə mobile responsive-lik deyilir. Müştəri davranışları əsasında diqqət etsək, burada ən önəmli məsələ interfeysin sadə və asan istifadə oluna bilən olmasıdı. Komputer versiyası mobil versiyaya elə adaptasiya edilməlidir ki, burada mövcud görünüş mobil cihazda aydın və səliqəli görünsün. Mobil görünüşü yoxlamaq üçün SEOptimzer alətindən istifadə edə bilərsiniz.

Şəkillərin Optimizasiyası

Google-da şəkil axtarışlarından istifadə edildiyi üçün, biz şəkillərin optimizasiyası işi ilə də məşğul olmalıyıq. Optimizassiya işləri görülən sektordan asılıdır. Əgər sizin SEO işi gördüyünüz veb-saytda olan məhsul və xidmətlərin şəkilləri müştəriləriniz tərəfdən axtarılırsa, bu sizin üçün çox əhəmiyyətli bir optimizasiya işidir. Daha çox mebel, aksesuar və hədiyyə tipli digər məhsulların(hansı ki, insanlar baxıb sonra almaq qərarına gəlir) satışını şəkillərin optimizasiya edilməsi ilə artıra bilərsiniz. Burada ən önəmli detal alt teqi hesab edilir. Ona görə şəkillərin alt teqini uyğun açar sözlərlə işləməyə diqqət etməliyik.

Saytın Arxitekturası

Saytın arxitekturası dedikdə, onun quruluşu və sahib olduğu forması nəzərdə tutulur. Bura – header, footer və body hissələrinin düzgün qurulması aiddi.On Page SEO işlərinin təsirli olması üçün düzgün arxitektura çox önəmlidir. Arxitekturanı Screaming Frog aləti ilə yoxlaya bilərsiniz. Burada önəmli olan səhifələr arasındakı əlaqələrin qurulması, düzgün naviqasiya və müştəri yönümlü olmasıdır.

Xarici Linklər

Uyğun səhifələrdən digər saytlara linklərin verilməsi çox əhəmiyyəti bir məsələdir. Belə ki, mən On Page SEO ilə bağlı məqaləmə bu mövzu ilə əlaqəli məhşur və çox istifadə olunan bir neçə mənbəni əlavə etsəm, bu mənim səhifəmin gücünü artıracaq. Google botları əlaqəli və yüksək reytinqli saytlara keçid olunmasını müsbət dəyərləndirir. On Page SEO ilə əlaqəli daha ətraflı öyrənə bilərsiniz.

Daxili Linklər

Mən təkcə başqa saytlara yox həmçinin öz saytımın daxilində bir səhifədə digər səhifələrə link verə bilərəm. Misal üçün, bu yazımıza SEO xidməti səhifəsindən, SEO Mütəxəssisi bloqumuzda daxili link verə bilərik. Bu işi adətən güclü səhifələrdən zəif səhifələrə məntiqi ilə edirlər. Güclü səhifə dedikdə PA(Page Authority) yüksək olan səhifə nəzərdə tutulur. Bunu yoxlamaq üçün Website SEO checker istifadə edə bilərsiniz.

Suallarınız var?

Hörmətli oxucu, qeyd etmək istəyirəm ki, bu yazı SEO sahəsinə yeni başlayanlar üçün nəzərdə tutulmuşdur. Ana dilində kontentlərin yoxluğunu nəzərə alaraq, çalışıram ki, mütəmadi olaraq ixtisaslaşdığım sahə ilə əlaqəli faydalı məlumatları sizinlə bölüşüm. Əlavə olaraq deyə bilərəm ki, bloqlar yeni informasiyalar və prakitki biliklər əsasında yeniləcək.Hər hansısa bir sualınız və ya müzakirə etmək istədiyiniz mövzu olaraq mənimlə əlaqə saxlaya bilərsiniz, ümid edirəm sizin üçün faydalı olmuşdur.

On-Page SEO nədir? Read More »

SEO Mütəxəssisi kimdir?

İlk öncə SEO haqqında qısa bir şərh verməklə mövzuya başlamaq istəyirəm. SEO sözünü ana dilində tərcümə etsək, Axtarış Motorlarının Optimizasiya(AMO) kimi başa düşmək olar. Burada axtarış motorları dedikdə Google, Yandex və Bing misal göstərə bilərik. Optimizasiya sözünü isə təkmilləşdirmək ilə əvəzləmək mümkündür, burada məqsəd veb-saytın axtarış motorlarına uyğun bir formaya salınması və ya təkmilləşdirilməsidir. Bütün bu təkmilləşdirmə işlərini birbaşa həyata keçirən şəxsə SEO Mütəxəssisi deyilir. Ölkəmizdə o qədər də tanınmayan bu şəxslər əslində arxa fonda ciddi zəhmət çəkirlər. Bu məqaləni yazmaqla həm SEO Mütəxəssislərinin işlərini təsvir etmək həm də bu sahəyə necə başlamaq olar və ya bu sahədə necə təkmilləşmək olar kimi mühim suallara cavab vermək istədim.

SEO Mütəxəssisi hansı işləri görür?

Bəlkə də bir çoxları bu cümlələri eşidib. SEO lazım deyil, bu qədər vaxt gözləmək olmaz və ya hammısı boş şeydir kimi ifadələr əslində bu sahədən məlumatsızlıq və həmçinin görülən işlərin düzgün təqdim olunamamasından qaynaqlanır. Qısa olaraq fikrimi ifadə etməyə çalışsam, gün ərzində axtarış motorlarından istifadə etməyən demək olar ki, çox az insan var. Son illərdə insanların onlayn platformalardan satış etmə faizi əvvəlki illərlə müqayisədə çoxalmışdır. Bir çox insan, məhsul almadan araşdırma etməyi və fərqli mağazaları müqayisə etməyi düşünür. Bu isə birbaşa Google və ya digər axtarış motorlarının istifadəsi deməkdir.

Nümunə olaraq: “ayaqqabı” almaq istəyən bir xanımı düşünsək, Google-a daxil olur və ayaqqabı satışı sözünü yazır. Təqribən ilk 5- ya 10 axtarış nəticəsini analiz edir və bu analizlər nəticəsində almağı düşünür. Onu da qeyd edim ki, ilk sıralara reklamla da çıxmaq mümkündür, lakin orqanik nəticələr insanlar üçün daha etibarlı görünür. Buda başqa bir araşdırma nəticəsində SEO-nun əhəmiyyətli olmasını sübut etmişdir.

SEO Mütəxəssisləri markanın satış gətirən və ya potensial ola biləcək açar sözlərdə ön sıralada çıxmasını həyata keçirir. Burda təkcə iş ön sıralarda çıxmaq deyil, həm də bu sıraları qoruyub saxlamaqdır. Araşdırmalar göstərir ki, ilk sırada çıxan saytların kliklənib daxil olunma nisbəti 25%-dir. Buda hardasa axtarışın və ya potensial müştərilərin 1/4 mənasını daşıyır. Təbii ki, bu hər sektora görə dəyişə bilər.

SEO Mütəxəssisinin işlərini qruplaşdırsaq:

Fəaliyyət göstərəcəyi sektoru analiz etmək,
Rəqibləri analiz etmək,
Axtarış həcmi yüksək olan və ya potensial ola biləcək sözləri araşdırmaq,
Veb-sayt arxitekturunun 0-dan qurulması və ya təkmilləşdiriməsi,
Saytdan alış senarisinin qurulması, ( daxil olan müştəriyə məhsul necə satılacaq?)
Sayt məntlərinin müştəriyə uyğun və düzgün olmasına nəzarət edilməsi,
Veb-saytın texniki işlərinin həyata keçirilməsi,
Veb-saytın daxili optimizasiya işlərinin görülməsi,
Veb-saytın xarici optimizasiya işlərinin görülməsi,
Davamlı olaraq saytın vəziyyətinə nəzarət edilməsi,
Axtarış səhifələrində(SERP) olan vəziyyətə nəzarət,
Texniki problemlərin izlənməsi və qısa zamanda həllİ üçün tapşırıqların verilməsi.

Bu siyahını daha da uzatmaq olar, lakin gələcək yazılarda daha ətraflı məlumatlar təqdim etmək baxımından və ya yazının daha da uzun və yorucu olmaması üçün bu qədəri ilə kifayyətlənməli oldum.

SEO Mütəxəssisi olmaq üçün haradan başlayaq?

SEO Mütəxəssisi kimi fəaliyyətə başlamaq istəyən insanlar ilk öncə bunu bilməlidir ki, bu sahə ciddi səbr tələb edir. Həm öyrənmək baxımından həm də nəticə sarıdan siz mütləq səbrli olmalısız. Burada təcrübə çox önəmlidir, ən əsası isə problem həll etmək xüsusiyyətiniz olmalıdır ya da inkişaf etdirməlisiz. Mən, özümdən danışsam bu sahənin araşdırma ilə daha sonra işlərimdə tətbiq etməklə öyrənmişəm. Hələ 2019-cu ildən bu sahə ilə maraqlanırdım və zaman-zaman yeni şeylər öyrəndim və tətbiq etdim. Daha dərindən öyrənmək fürstərim 2022-ci ildən etibarən Elseo şirkətində SEO mütəxəssisi olaraq fəaliyyətə başlamaqla oldu. Qeyd edim ki, orada işim ancaq SEO idi və müxtəlif sektorlardan şirkətlərin veb-saytlarını axtarış motorlarına uyğun təkmilləşdirməyə çalışırdım. İlk vaxtlar çətinlik çəkirdim düzü, zaman-zaman araşdırmaqla, iş yoldaşlarımla və bizə bu işdə kömək edən rəhbərlərimizlə birlikdə daha da təkmilləşməyə başladıq. Amma davamlı araşdırmaq və problemi həll etməyə çalışmaq xüsusiyyəti hər zaman mənə kömək eləmişdi. Buda birdən-birə olmadı, zamanla insanda formalaşır – sadəcə həvəsdən düşməmək və problemi həll edənə qədər çalışmaq lazımdır.

Xülasə etsəm;

Araşdıma etməlisiz,
Onlayn və ya oflayn kurslar götürə bilərsiniz,
Sahə üzrə mütəxəssislərdən soruşa bilərsiniz,
Əsası – WordPress kimi sadə CMS-lər ilə veb-sayt qurub, öyrənib praktika edə biləsiniz.

Bu barədə sorğu keçirmişdim, insanlar böyük qismi araşdırma yolu ilə öyrəndiyi qeyd etdi. Bu barədə Facebook-da qrup yaratmışam, SEO Community Azerbaijan adının üzərinə klik edərək daxil ola bilərsiniz. Bu qrupda bir çox mövzular ilə əlaqəli yazılarımı da tapa bilərsiniz, məncə faydalı olacaq.

Moz'un Senior SEO Expert'nin SEO mütəxəssisi olmaq istəyənlərə tövsiyələri

SEO sahəsində özünüzü təkmilləşdirmək üçün

Siz gərək davamlı olaraq araşdırma edəsiniz və günlük xəbərləri izləyəsiniz. Bundan əlavə sahə çox genişdir, misal üçün bir çox insanlar Sayt Daxili (On Page) SEO-nu bilir və ya Saytdan Kənar( Off Page) görülən SEO ilə daha çox məşğul olur və Texniki SEO işlərindən isə uzaqdır. Bu senarilərin əksi də ola bilər, hər halda bir istiqamətdə boşluq varsa, onun üzərində işləyib təkmilləşdirmək lazımdır. Əgər bu istiqamətlərdə lazımı işlər görülübsə, məsləhət görərdim ki, kodlaşdırma bacarıqlarını təkmilləşdirəsiniz. Burada əsas HTML, CSS və Java Script kodları nəzərdə tutulur. Bunu yazmaq üçün yox, anlamaq üçün öyrənmək lazımdır. Çünki SEO-nun veb-saytın arxa fonunda görülən işlərlə ciddi əlaqəsi olduğu üçün, prosesləri anlamaq və düzgün texniki tapşırıq vermək üçün sizə lazım olacaq.

SEO Mütəxəssisi nə qədər qazanır?

SEO Mütəxəssisinin qazancı onun bilik və bacarıqlarından birbaşa asıldır. Buna görə vəzifə bölgüləri formalaşmışdır – Kiçik, Orta və Baş Mütəxəssis vəzifələrinə görə alacağınız əməkhaqqı da dəyişəcək. Bundan əlavə fəaliyyət göstərəcəyiniz quruma görə də əməkhaqqı məsələləri dəyişkəndir. Aşağısı 600 Azn – dən başlayaq 2000 Azn və hətta bundan daha çox aylıq gəlir əldə edə bilərsiniz. Onuda qeyd edim ki, SEO Mütəxəssisinin gəlir mənbələri çox olur, bu haqda digər bir bloq yazımda paylaşacam. Aşağıdakı şəkil ilə əlaqəli məqaləni oxumaqda fayda var – SEO Mütəxəssisinin təcrübəyə görə dəyişən gəlir qrafiki.

Onlayn və ya Oflayn SEO kursu

Tələb əsasında SEO kursuna başlamağı düşünürəm. Bunu həm onlayn formada həm də oflayn formada həyata keçirə bilərəm. İlkin olaraq onlayn formada nəzərdə tutmuşam.Bundan əlavə ödənişsiz formada sizlərə istiqamət göstərmək və qarşılaşdığınız problemlərin həll olunması yolunda dəstək olmağa daim hazıram. Həmçinin yerli və xarici bizneslər üçün SEO xidməti də göstərirəm.Portfoliom və təklif paketləri ilə maraqlanan olarsa, birbaşa mənimlə əlaqə saxlaya bilər.

Saxavat Jafar

saxavatjafar.com/

SEO Mütəxəssisi kimdir? Read More »